De Opera-SietGet Opera

Link:Opera op Platt Link:Niege Knööp Link:Opera ünner Windows un Linux Anner Spraak: Diese Seite auf Hochdeutsch

Opera op Platt - deegten Kraam

Plattdüütsch

Mit den Begreep „Plattdüütsch“ meent een normalerwies de in Düütschland snackten Dialekten vun de Neddersass'sche un de Oostnedderdüütsche Spraak. Man dat Neddersass'sche höört ok en Reeg Dialekten to, de in de Nedderlannen snackt warrt, as Twentsch, Stellingwarfs oder Veluws, ok Plautdietsch höört dor mit to, wat tomehrst vun mennonitsche Utwannerers snackt warrt. Neddersass'sch un Oostnedderdüütsch bildt tosamen mit de nedderfrankschen Spraken (Nedderlandsch, Nedderrheinsch un Afrikaans) den nedderdüütschen Telg vun de westgermaanschen Spraken, vun de de annern grötteren Telgen Engelsch, Scotsch, Freesch, Hoochdüütsch un Jiddsch sünd. Platt is also wohrhaftig keen Dialekt vun't Hoochdüütsche. Dat westliche Platt, also dat Neddersass'sche, lett sik in dree Hööftdialekten opdelen, dat sünd Westfäälsch, Oostfäälsch un Noordsass'sch, vun dat de Dialekten de olen Wöör un Strukturen wull op't Best wohrt hebbt. Dat internatschonale Sprakenteken na ISO 639-2 is in't Övrige „nds“ för „Nedersass'sch“. Dit „Sass'sch vun de nerrn liggen Lanne“ warrt al jümmers ok binnen den noordööstlichen Deel vun de Nedderlannen snackt, man dor warrt dat anners schreven, as dat hier normaal is. Ok dor ward de Spraak „Nedersaksisch“ nöömt. Man mit dat „Sächsisch“, wat in't Bundsland Sachsen snackt warrt, hett dat reinweg gor nix to doon.

För dat Översetten heff ik en Oort standardiseert Form vun't noordsass'sche Plattdüütsch bruukt, to'n Bispeel bruuk ik „opmaken“ ansteed vun „opmouken“, wat mi egentlich natürlich dücht, as ik vun de Westküst vun Sleswig-Holsteen kumm. De Schriefwies richt sik tomehrst na Sass un G. Harte un J. Harte. För de Tokunft sweevt mi vör, noch en Verschoon mit de internatschonaliseert Schriefwies na Ron F. Hahn to maken. Fehlers, Fragen, Vörslääg för Verbetern, Loff oder Meckeree bitte <s[Ünnerstreek]dibbern[At-Teken]web[Punkt]de> tostüern.

„Opera op Platt“ süht bi mi so ut (mit mien egen Skin „KDE-HiCrysal“ v1.21):

Screenshot von Opera op Platt


Aktuell Verschoon - Opera 9.20

De Spraakdatei för Plattdüütsch gifft dat in dree Verschonen: Een Datei för Windows, een för Linux, un to'n Drütten en kombineert Verschoon, de op beed Bedriefsystemen to bruken is. Ik heff de Verschoon för Opera 8 heel nieg översett, nu warrt överall de Schriefwies vun KDE op Platt bruukt. All Dateien sünd opzippt, de utpackte Datei kann eenfach na den Opera-Orner verschaven un denn ünner Preferences (Alt+P) > General > Language - Details… utsöcht warrn. Op Opera-Info.de gifft dat en Forum för Opera op Platt.

Öller Verschonen un Weken-, Vöransicht- un Beta-Utgaven

Ok för öller un nieger Opera-Verschonen gifft dat Spraakdateien, un dor ok jümmers een för Windows, een för Linux, un een kombineert Verschoon. Wenn en Preview- oder Beta-Verschoon noch nich för Linux rutkamen is, kann dat natürlich ok keen Linux- oder kombineert Verschoon geven. Söök Di man ruut, wat Du bruukst. Opstunns staht hier bloots de Dateien för Opera 8.5x un nieger, man ik heff för meist all Verschonen ok en Spraakdatei. Wenn Du wat besünners bruukst, segg man Bescheed. (Mien Nettpostadress steiht binnen den Kopp vun mien Spraakdatei.)

VerschoonWindowsLinuxkombineert
8.5x X X X
9.00 X X X
9.01/2 X X X
9.10 X X X

Tolest ännert: 11.04.2007, 23:46 MESZ

Valid HTML 4.01! Get Opera